【少年夢想「家」】疫境自學自強 從家庭零溝通 到做 Event達人 Karmen學懂團隊精神

三年前,家中小兒幼兒園畢業,身為家長義工,我主動加入了謝師宴籌委小組,希望多出一分力,為孩子這階段劃上完美句號。關於活動策劃及統籌工作,自問還算稱職,但想起當日需同時處理接近50位只有6歲的孩子於台上演出,我便不得不向Karmen求救,心想:「幼兒園謝師宴對她來說,應該是小小小兒科吧!」

掌握live streaming過渡疫境寒冬

三年後,一個在家工作的早上,碰上休假半天的Karmen,她跟我講述疫境中event行業茫然無措的景況⋯⋯自去年6月,接二連三的社會事件,令event行業提早踏入寒冬。專門接辦企業活動及公眾活動的Karmen慨嘆道:「大部分客戶舉辦活動地點都喺會展、九展或旺角等地方,公司不斷收到客要cancel event嘅通知,有啲抱住『搏一搏』心態嘅客,我哋就建議安排shuttle bus畀參加者,或索性將活動提早到晏晝4點開始。」

活動生意難做的日子持續,一直到今年1月農曆新年前後,本屬event行業「旺季」的日子,在新冠肺炎疫情影響下,Karmen公司上下卻只得生意兩宗。原以為第二季度會有回春表現,怎料疫情持續,讓event行業寒冬延長。「喺4月開始,公司積極轉型,老細畀員工上workshop學live streaming,同時update大家最新嘅『台燈聲』技術。」由Zoom Webinar、Facebook Live、MS Teams Event、Weblink到外國比較多用的Bluejeans等,Karmen也需掌握操作,「唔識嘅唔熟嘅,咪自學囉,自己上吓Google,上吓YouTube,睇吓乜嘢可以做到,乜嘢係做唔到,總之就一路學一路做啦!」她拿出筆記簿,向我這行外人詳細講解做on site event所需要的人手如何,而同時加上live streaming的活動又有何分別等,得見她對工作的認真、專業和投入。

鍾意就要不怕蝕底

「我真係好鍾意做event!我好想入行!」這是Karmen大專時期常掛嘴邊的一句話。一次實習初體驗event工作,讓Karmen立意在這行頭闖一番天地。畢業至今7年多,在不同機構服務過,由兼職臨時活動助理,晉升至現任活動策劃顧問公司的項目經理。她曾處理超過200多個event項目,當中包括為人熟悉的公眾活動如香港渣打馬拉松、香港國際美食巡禮、有多家上市公司大型周年晚宴及特別活動如McDonald’s Plan to Win Communication Day及Doctor for A Day、也有文藝及慶祝活動如閃耀維港燈影節,幻彩詠香江等等⋯⋯

Karmen認為做event最緊要有不怕蝕底的精神,「其實有多嘢要親自落手落腳去做,活動前嘅場地佈置、同嘉賓嘅rehearsal,到活動完結要執垃圾。當有歌手表演,台上台下都要有人stand by保護artist,但又唔可以企喺度搶咗focus,所以要痞低喺台邊成20分鐘,對腳屈住會痺哂。又有時會OT到凌晨,完show會攰到坐底都瞓着。」到底Karmen這不怕蝕底的精神,會是從小由家庭鍛鍊出來的嗎?

原生家庭重男輕女  兄妹間零溝通

媽媽生了三兄姊妹,Karmen家中排行最小。哥哥比她大10年,彼此間有隔膜,有代溝,「好記得細個嗰時,有次我喺屋企自己蒸燒賣食,一煮好出嚟,阿哥想搶哂去食,我好嬲咁用成個碗扑落佢頭,佢即時『爆缸』⋯⋯」兩兄妹在家可謂是零溝通,但又常為各樣小事打架,互不相讓;姊姊會嘗試保護及勸喻Karmen,或許是出於反叛心態,她一概都不領情。Karmen又記起兒時單獨與爸爸到茶樓「飲茶」經歷,整個過程也是零溝通。

Karmen特別記得媽媽的兩句說話。有一回不見哥哥回家,Karmen問媽媽他是否搬走了?媽媽應道:「要搬走嘅話,都係妳唔係佢啦!」即使媽媽當時是笑笑口地回答,這句話卻令Karmen深感氣憤,覺得媽媽事事偏袒哥哥,萌生要盡快逃離這個家的念頭。「不過,係阿媽教我『做人要勤勤力力,唔好畀人睇唔起!』我諗呢句說話對自己係有正面影響,所以我而家做嘢有唔怕蝕底嘅心態,學多咗嘅係自己,機會多咗嘅都會係自己。」

因傷入院不再任性 更懂為爸媽着想

正所謂年少輕狂,在家感受到不公平對待,而家人又缺乏有效溝通的情況下,Karmen中一時期曾曠課,上課時間跟朋友走到街上玩。及後,她在運動場上找到自己的一片天,加入了學校籃球隊,並全心全意投入練習,「阿爸阿媽其實反對我成日打波,但係愈被禁止去做嘅事,我當時就愈係要去做!」中三那年,Karmen因過量運動導致膝蓋受傷多次,曾入院進行手術,兩年內需四度「打石膏」及接受物理治療良久。Karmen自此不再任性,多聽家人勸告,更懂愛錫身體,並努力讀書,但內心仍是渇望自立的一天可快到來。

Karmen自去年已完全自立,與友人在外租屋居住。受多次「中風」影響,Karmen爸爸近年身體變差,需靠輪椅出入;媽媽5年前曾患上癌症,幸而得到適切醫治,現已康復。姊姊嫁得好人家,專心相夫教子,Karmen姪兒如今已3歲了,是她的心肝寳貝。「人大咗,冇再打交啦,我同阿哥雖然仍然係無乜幾句,不過係和諧咗嘅。」Karmen現在一個月回家探望爸媽一趟,希望哥哥和嫂子在家更愛錫年紀老邁的爸媽,並表示自己隨時候命,願三兄姊妹間更多一起分擔。

與家人比以前和諧,3歲的姪兒成為Karmen的心肝寶貝。

Event因團隊而成功  因「集郵」更精采

做event那麼辛苦,是甚麼原因讓Karmen熱愛不減呢?她認真地説:「每一個event都真係一份『心血結晶』,由零到有,由構思到成事,都好講teamwork,最後event完咗個客滿意,好高興咁同你講『good show』,就係呢種成功感,成為我嘅動力!」另一較為有趣原因則是難得的「集郵」機會,每次活動完成,總有機會跟當日的司儀、歌手或特別嘉賓來張合照,為當日工作添上額外色彩。

Karmen寄語有心入行的年輕人做事要主動些、也要「上心」些,做event一定要熟讀rundown,過程多留意別人怎做事,謝絶「hea」做的態度⋯⋯3年前小兒的幼兒園謝師宴最後是怎樣?Karmen和另一師弟Lawrence在台前幕後,與其他家長義工打點一切妥當,處理50多位孩子無難度,我則於台上努力扮演司儀角色,師生成好友,完場good show!

Karmen。我和Lawrence在小兒幼兒園謝師宴完場good show。

(美姿老師/撰文;圖片/受訪者提供)

贊助《風新聞》 守護家庭價值 我們需要你們的支持
大新銀行戶口: 040-634-3280684-1 (「風聞社有限公司」/ THE PNEUMA MEDIA LIMITED)